Mae menter unigryw yn agor cyfleoedd newydd i bobl ag anableddau dysgu dwys a lluosog (PMLD) ledled Gogledd Cymru.
Mae Making Sense CIO wedi datblygu “Gwasanaeth Parseli Synhwyraidd” – gwasanaeth dosbarthu deunyddiau synhwyraidd, adnoddau a syniadau gweithgareddau dwyieithog sydd wedi’u cynllunio i helpu gofalwyr a staff cymorth i gysylltu â phobl ag anghenion synhwyraidd mewn ffyrdd ystyrlon a chreadigol.
Mae pob parsel wedi’i ysbrydoli gan leoliadau diwylliannol, arddangosfeydd neu artistiaid, gan greu ffynhonnell syniadau sy’n newid yn barhaus ac sy’n ennyn diddordeb yr holl synhwyrau. Gan weithio mewn cydweithrediad â phartneriaid a chyda chefnogaeth gan dimau gofal cymdeithasol rhanbarthol, mae Making Sense bellach yn ehangu cyrhaeddiad y parseli i fwy o grwpiau, teuluoedd a darparwyr gofal.
Fel rhan o’r twf hwn, mae rôl datblygu cyd-gynhyrchydd newydd yn cael ei chreu. Bydd y rôl yn canolbwyntio ar sicrhau bod pobl ag anableddau dysgu yn ganolog i’r broses o wneud penderfyniadau am y parseli, tra hefyd yn rhannu eu lleisiau’n ehangach trwy gyfryngau cymdeithasol, cylchlythyr a gynhyrchir ar y cyd, a theithiau a gweithdai synhwyraidd yn y dyfodol mewn lleoliadau diwylliannol.
“Mae ein cyd-gynhyrchwyr yn Popty yn Ninbych wrth wraidd y prosiect hwn,” meddai Ticky Lowe, Prif Swyddog Gweithredol Making Sense CIO. “Maen nhw’n sicrhau bod pob parsel yn hygyrch, yn ddeniadol, ac yn gynhwysol. Mae’r rôl newydd hon yn cryfhau eu cyfranogiad ac yn cydnabod y cyfraniad enfawr maen nhw’n ei wneud i’w cymunedau.”
Ar hyn o bryd, mae tîm o 10 o gyd-gynhyrchwyr ynghyd â staff cymorth yn Popty yn rhan o greu’r parseli, gan roi ymdeimlad cryf o bwrpas a chyfrifoldeb iddynt. Bydd cam newydd y prosiect yn adeiladu ar eu sgiliau ac yn annog mwy o ymgysylltiad â lleoliadau diwylliannol lleol, gan helpu mwy o bobl i deimlo’n gartrefol, yn hyderus, ac yn gynwysedig.
Drwy weithio fel ymgynghorwyr mynediad, bydd cyd-gynhyrchwyr yn cefnogi Making Sense i gyflwyno teithiau a gweithdai synhwyraidd, gan chwalu rhwystrau i fannau diwylliannol a sicrhau y gall pawb fwynhau lleoliadau ledled Gogledd Cymru.
‘Gwnaed ein prosiect yn bosibl diolch i #chwaraewyrLoteriGenedlaethol’
Mae’r prosiect hwn wedi’i wneud yn bosibl gyda chefnogaeth gan Gronfa Gymunedol y Loteri Genedlaethol, Cronfa Elusennol Baily Thomas a Gogledd Cymru Gyda’i Gilydd.
